Pambano
kati ya Kauzu FC dhidi ya Sifa United ni moja kati ya mechi zilizoweka
historia ya kushuhudiwa na umati mkubwa wa mashabiki katika michuano ya
Sports Xtra Ndondo Cup ambayoinaendelea na sasa ikiwa kwenye hatua ya 16
bora. Jana mchezo huo ulichezwa kwenye uwanja wa Bandari, Tandika na
mechi hiyo kuwa burudani nyingine kubwa kwa wapenzi wa soka wa vitongoji
vya jiji la Dar es Salaam.
Kama
ilivyo ada ya michuano hiyo pindi panapokuwa na mechi basi lazima kuwe
na burudani nyingine nje ya uwanja kutoka kwa mashabiki wa timu
zinazokuwa zikipambana uwanjani kusaka ushindi. Nje ya uwanja kunakuwa
na timu nyingine mbili za ushangiliaji zikipambana kuhakikisha timu zao
zinaibuka na ushindi kwa kuzishangilia mwanzo mwisho.
Wakati
mcheo wa jana ukiwa umepamba moto, kiliiingia kikosi cha ushangiliaji
cha Kauzu FC ambacho kilichelewa kwa dakika chache na kukuta mchezo
tayari umeshaanza kwa takribani dakika tano hivi.
Baada
ya timu hiyo ya ushangiliaji ya Kauzu FC kutinga uwanjani, uwanja wote
ulilipuka shangwe kutokana na amshaamsha zilizofanywa na washangiliaji
wa Kauzu FC ambao walikuwa wakiimba na kupiga ngoma zilizoonekana
kuwakuna mashabiki wengi wa timu hiyo.
Kubwa
zaidi ni babu aliyekuwa akiongoza timu hiyo ya ushangiliaji. Mzee huyo
alikuwa amejichora kwa rangi, amevalia msuli na amebeba kapu kubwa
lilishonwa kwa majani maarufu kwa jina la ‘miyaa’.
Tofauti na watu wengi
walivyodhani, mzee huyo alianza kuuzunguka uwanja mzima akipunga mkono
kwa mashabiki wa timu hiyo ambapo kila alipopita na kupunga mkono
ziliibuka shangwe za kutosha huku watu wakimshangilia kwa kupiga makofi.
Mtandao
huu ukataka kujua siri ya mzee huyo kuwa sehemu ya timu ya ushangiliaji
ya Kauzu FC, kwa taarifa za haraka tu akasema yeye amekuwa sehemu ya
timu hiyo kwa muda mrefu na anaipenda sana Kauzu FC kuliko timu nyingine
yoyote ndio maana ameamua kuacha mambo mengine na kuibuka uwanjani
kuongoza kikosi kizima cha ushangiliaji kuhakikisha Kauzu inaibuka na
ushindi na kusonga mbele.
No comments:
Post a Comment